ബാക്റ്റീരിയല്‍ വാട്ടത്തെ ചെറുത്ത് തക്കാളിക്കൃഷി

തുടക്കത്തിലേ ശ്രദ്ധിച്ചില്ലെങ്കില്‍ ബാക്റ്റീരിയല്‍ വാട്ടം നമ്മുടെ എല്ലാ ചെടികളെയും നശിപ്പിക്കും.

By Harithakeralam

2024-02-11

തക്കാളിക്കൃഷി ആരംഭിക്കാന്‍ അനുയോജ്യമായ സമയമാണിത്. പലരും കൃഷി തുടങ്ങിയിട്ടുമുണ്ടാകും. എന്നാല്‍ കേരളത്തില്‍ തക്കാളിച്ചെടികളില്‍ സാധാരണ കാണപ്പെടുന്ന രോഗമാണ് ബാക്റ്റീരിയല്‍ വാട്ടം. തുടക്കത്തിലേ ശ്രദ്ധിച്ചില്ലെങ്കില്‍ ബാക്റ്റീരിയല്‍ വാട്ടം നമ്മുടെ എല്ലാ ചെടികളെയും നശിപ്പിക്കും.  

ലക്ഷണം

1. ചെടികള്‍ വേഗത്തില്‍ വാടി നശിച്ചു പോകുന്നു.

2. രോഗം ബാധിച്ചു നശിച്ച ചെടിയുടെ ഭാഗങ്ങള്‍ മുറിച്ചെടുത്ത് വെള്ളത്തിലിടുക.  ഈ സമയത്ത്  മുറിച്ച അറ്റത്തു നിന്നും  വെളുത്ത വര പുറത്തുവരും.

3. ചെടിയുടെ താഴ്ഭാഗത്തുള്ള ഇലകള്‍ വാടുംമുമ്പു തന്നെ പൊഴിഞ്ഞു പോകും.

Related News

കൈനിറയെ വിളവെടുക്കാന്‍ സ്വീകരിക്കേണ്ട തന്ത്രങ്ങള്‍

അരുമനായ്ക്കള്‍ക്ക് സമ്മര്‍ കെയര്‍; അറിയേണ്ടതും കരുതേണ്ടതും

പൂക്കളുടെ രാജ്ഞി ജാഡ് വൈന്‍

ചീര വേഗത്തില്‍ വളരാന്‍ വളമിങ്ങനെ നല്‍കണം

പരിഹാരം

തൈകള്‍ നടുന്നതിന് മുമ്പ് സ്യൂഡോമോണസ് ലായനിയില്‍ അര മണിക്കൂര്‍ മുക്കിവയ്ക്കുക. തുടര്‍ന്ന് രണ്ടാഴ്ചയിലൊരിക്കല്‍ സ്യൂഡോമോണസ് ലായനി 20 ഗ്രാം ഒരു ലിറ്റര്‍ വെള്ളത്തിലെന്ന തോതില്‍ തളിക്കാം. നടുന്നതിന് മുമ്പ് തൈകള്‍ സ്‌ട്രെപ്‌റ്റോസൈക്ലിന്‍ ലായനിയില്‍ അര മണിക്കൂര്‍ മുക്കിവയ്ക്കുന്നതും നല്ലതാണ്. നിലം ഉഴുതുമറിച്ചു  സെന്റിന് 10 ഗ്രാമെന്ന തോതില്‍ ബ്ലീച്ചിംഗ് പൗഡര്‍ ചേര്‍ക്കുക. വാണിജ്യമായി കൃഷി ചെയ്യുകയാണെങ്കില്‍ നിര്‍ബന്ധമായും ഇങ്ങനെ ചെയ്യണം.  

ശ്രദ്ധിക്കേണ്ട കാര്യങ്ങള്‍

മുക്തി, അനഘ, മനുലക്ഷ്മി, മനുപ്രഭ, അക്ഷയ, വെള്ളായണി വിജയ് തുടങ്ങിയ ഇനങ്ങള്‍ ബാക്റ്റീരിയല്‍ രോഗത്തെ ചെറുക്കുന്നവയാണ്. ഇവ കൃഷി ചെയ്യാന്‍ ശ്രമിക്കുക. രോഗം ബാധിച്ച ചെടികള്‍ ഉടന്‍ തന്നെ തോട്ടത്തില്‍ നിന്ന് നീക്കം ചെയ്യുക. കത്തിച്ച് കളയുന്നതാണ് ഉചിതം. പരിചരണം നടത്തുന്ന കര്‍ഷകനും കൃത്യമായ ശ്രദ്ധ പുലര്‍ത്തണം. രോഗം ബാധിച്ച ചെടി നശിപ്പിച്ച ശേഷം കൈകളും കത്തി പോലുള്ള ഉപകരണങ്ങളും കഴുകി അണുവിമുക്തമാക്കുക. തടത്തില്‍ വെള്ളം കെട്ടികിടക്കുന്നില്ലെന്ന് ഉറപ്പ് വരുത്തുക. മണ്ണ് പരിശോധിച്ച് തക്കാളിയുടെ pH 6.2 മുതല്‍ 6.5 വരെയാണെന്ന് ഉറപ്പ് വരുത്തുക, അല്ലെങ്കി മാറ്റുക. തുടര്‍ച്ചയായി ഒരു സ്ഥലത്ത് തന്നെ തക്കാളി കൃഷി ചെയ്യാതിരിക്കുക.