പുതിന വളര്‍ത്താം വെള്ളത്തില്‍

മണ്ണും വെയിലും വളവുമൊന്നുമില്ലാതെ വെള്ളത്തില്‍ നമുക്ക് പുതിന വളര്‍ത്താം, വളരെ ലളിതമായൊരു പ്രക്രിയയാണ്.

By Georgekutty Mathew

2026-02-27

വിവിധ വിഭവങ്ങളില്‍ നാം ഉപയോഗിക്കുന്ന പുതിന മനുഷ്യന് ഏറെ ഗുണങ്ങള്‍ നല്‍കുന്ന ഇലയാണ്. എന്നാല്‍ വിപണിയില്‍ ലഭിക്കുന്ന പുതിനയില്‍ വലിയ തരത്തിലുള്ള കീടനാശിനികള്‍ പ്രയോഗിക്കുന്നതാണ്. ഇതു വലിയ തരത്തിലുള്ള ആരോഗ്യപ്രശ്നങ്ങളാണ് നമുക്കുണ്ടാക്കുക. ഇതിനൊരു പരിഹാരം നാം തന്നെ പുതിന വളര്‍ത്തുകയാണ്. മണ്ണും വെയിലും വളവുമൊന്നുമില്ലാതെ വെള്ളത്തില്‍ നമുക്ക് പുതിന വളര്‍ത്താം,  വളരെ ലളിതമായൊരു പ്രക്രിയയാണ്.

ഇതിനായുള്ള ഘട്ടങ്ങള്‍ താഴെ പറയുന്നവയാണ്.

1. തണ്ട് തിരഞ്ഞെടുക്കുക

ഏകദേശം 4 മുതല്‍ 6 ഇഞ്ച് വരെ നീളമുള്ള ആരോഗ്യമുള്ള പുതിനത്തണ്ടുകള്‍ മുറിച്ചെടുക്കുക.പൂക്കളില്ലാത്ത തണ്ടുകള്‍ തിരഞ്ഞെടുക്കുന്നതാണ് വേരുകള്‍ പെട്ടെന്ന് വരാന്‍ നല്ലത്. ഇലകള്‍ മുളച്ചു വരുന്ന മുട്ടിന്  തൊട്ടുതാഴെയായി മുറിക്കാന്‍ ശ്രദ്ധിക്കുക.

2. തണ്ട് തയ്യാറാക്കുക

തണ്ടിന്റെ താഴത്തെ ഭാഗത്തെ ഇലകള്‍ നീക്കം ചെയ്യുക. ഏകദേശം 2 ഇഞ്ച് ഭാഗം ഇലകളില്ലാതെ വേണം. മുകള്‍ഭാഗത്ത് കുറച്ച് ഇലകള്‍ നിലനിര്‍ത്തുക. വെള്ളത്തില്‍ ഇലകള്‍ മുങ്ങിയിരിക്കാന്‍ പാടില്ല, കാരണം വെള്ളത്തിനടിയിലുള്ള ഇലകള്‍ ചീഞ്ഞുപോകാന്‍ സാധ്യതയുണ്ട്.

Related News

പച്ചമുളകും തക്കാളിയും മുരടിച്ചു നില്‍ക്കുന്നുണ്ടോ...? ചാരം രക്ഷയ്‌ക്കെത്തും

കഴുത്തു വേദന കുട്ടിക്കളിയല്ല: ഇക്കാര്യങ്ങള്‍ ശ്രദ്ധിച്ചില്ലെങ്കില്‍ പിടലീ വിളി കേള്‍ക്കേണ്ടി വരും

ഇലതീനി പുഴുവിനെ തുരത്താന്‍ പപ്പായ ഇല

മുട്ടയോ ചിക്കനോ ... ആരോഗ്യത്തിന് മികച്ചത് ഏതാണ്

3. വെള്ളത്തില്‍ വെക്കുന്ന രീതി

ഒരു ഗ്ലാസിലോ ചെറിയ കുപ്പിയിലോ പകുതി വെള്ളമെടുക്കുക.തയ്യാറാക്കിയ തണ്ടുകള്‍ ഇതിലേക്ക് ഇറക്കിവെക്കുക. ഇലകള്‍ നീക്കം ചെയ്ത ഭാഗം വെള്ളത്തില്‍ മുങ്ങിയിരിക്കണം.ഇത് നേരിട്ട് വെയില്‍ അടിക്കാത്ത, എന്നാല്‍ വെളിച്ചമുള്ള ഒരു സ്ഥലത്ത് വെക്കുക.

4. ശ്രദ്ധിക്കേണ്ട കാര്യങ്ങള്‍

വെള്ളം മാറ്റുക: ഓരോ 2-3 ദിവസം കൂടുമ്പോഴും കുപ്പിയിലെ വെള്ളം മാറ്റിക്കൊടുക്കണം. ഇത് വേരുകള്‍ക്ക് ആവശ്യമായ ഓക്സിജന്‍ ലഭിക്കാന്‍ സഹായിക്കും.

വേരുകള്‍ വന്നാല്‍ മണ്ണിലേക്ക് മാറ്റാം

ഏകദേശം 5 മുതല്‍ 10 ദിവസത്തിനുള്ളില്‍ പുതിയ വെള്ള വേരുകള്‍ വരുന്നത് കാണാന്‍ സാധിക്കും. വേരുകള്‍ക്ക് ഏകദേശം 1 മുതല്‍ 2 ഇഞ്ച് വരെ നീളം വന്നാല്‍ ഇവ മണ്ണിലേക്ക് മാറ്റി നടാം.

ശ്രദ്ധിക്കേണ്ട കാര്യങ്ങള്‍

1. വെള്ളം ഇടയ്ക്കിടെ മാറ്റുക

 ആഴ്ചയിലൊരിക്കല്‍ പോലും വെള്ളം മാറ്റാന്‍ മടിക്കരുത്. ഓരോ 2-3 ദിവസം കൂടുമ്പോഴും കുപ്പിയിലെ പഴയ വെള്ളം പൂര്‍ണ്ണമായും കളഞ്ഞ് പുതിയ വെള്ളം നിറയ്ക്കണം. കൊതുകിന്റെ മുട്ടകള്‍ വിരിഞ്ഞ് ലാര്‍വകളാകാന്‍ ഏകദേശം 7-10 ദിവസമെടുക്കും, അതിനുമുമ്പ് വെള്ളം മാറ്റുന്നത് ഇത് തടയും.

2. കുപ്പി കഴുകുക

 വെള്ളം മാറ്റുന്ന സമയത്ത് കുപ്പിയുടെ ഉള്‍ഭാഗം നന്നായി കഴുകണം. കുപ്പിയുടെ വശങ്ങളില്‍ കൊതുകിന്റെ മുട്ടകള്‍ പറ്റിയിരിക്കാന്‍ സാധ്യതയുണ്ട്. വെള്ളത്തില്‍ ലാര്‍വകളെ  കണ്ടാല്‍ ഉടന്‍ തന്നെ ആ വെള്ളം ദൂരേക്ക് കളയുകയും കുപ്പി സോപ്പിട്ട് കഴുകുകയും ചെയ്യുക.

3. തണ്ടുകള്‍ വൃത്തിയാക്കുക

 വെള്ളം മാറ്റുമ്പോള്‍ പുതിനത്തണ്ടിന്റെ വേരുകളും പതുക്കെ കഴുകുന്നത് നന്നായിരിക്കും.ഇടുങ്ങിയ കഴുത്തുള്ള കുപ്പി ഉപയോഗിക്കുക: വീതിയുള്ള പാത്രത്തിന് പകരം ഇടുങ്ങിയ കഴുത്തുള്ള  കുപ്പികളോ ജാറുകളോ ഉപയോഗിച്ചാല്‍ കൊതുകുകള്‍ക്ക് ഉള്ളിലേക്ക് കടക്കാന്‍ പ്രയാസമായിരിക്കും.

4.നെറ്റ് ഉപയോഗിച്ച് മൂടുക

 കുപ്പിയുടെ വായ ഭാഗം ഒരു ചെറിയ നെറ്റ്  അല്ലെങ്കില്‍ കനം കുറഞ്ഞ തുണി ഉപയോഗിച്ച് കെട്ടിവെച്ചാല്‍ കൊതുകുകള്‍ മുട്ടയിടുന്നത് തടയാം. പുതിനത്തണ്ട് മാത്രം ഇതിനിടയിലൂടെ പുറത്തേക്ക് വെച്ചാല്‍ മതി.

ഗുണങ്ങള്‍

എപ്പോഴും നല്ല ഫ്രഷ് പുതിന ലഭിക്കുമെന്നതാണ് പ്രധാന ഗുണം. അതു പോലെ  വാണിജ്യാടിസ്ഥാനത്തില്‍ കൃഷി ചെയ്യുന്ന പുതിനയില്‍ കീടനാശിനികള്‍ തളിക്കാന്‍ സാധ്യതയുണ്ട്. വീട്ടില്‍ വളര്‍ത്തുമ്പോള്‍ രാസകീടനാശിനികള്‍ ഇല്ലാതെ തികച്ചും ജൈവരീതിയില്‍ നമുക്ക് ഇത് വളര്‍ത്താം. പുതിനയുടെ മണം മനസ്സിന് ഉന്മേഷം നല്‍കുന്നതാണ്. ജനല്‍പടികളിലോ ബാല്‍ക്കണിയിലോ പുതിന വളര്‍ത്തുന്നത് വീടിനുള്ളില്‍ നല്ലൊരു സുഗന്ധം നിലനിര്‍ത്താന്‍ സഹായിക്കും. പുതിനയുടെ രൂക്ഷമായ ഗന്ധം കൊതുകുകള്‍, ഈച്ചകള്‍, ഉറുമ്പുകള്‍ എന്നിവയെ അകറ്റി നിര്‍ത്താന്‍ സഹായിക്കും.

( ദുബൈയില്‍ ഫാം മാനേജറാണ് ലേഖകന്‍  )