വരണ്ട കാലാവസ്ഥ തുടരുന്നു; പാവലില്‍ കായീച്ച തക്കാളിയില്‍ വെളളീച്ച

പാവല്‍, തക്കാളിപോലുള്ള വിളകളില്‍ വെളളീച്ചയുടെ ശല്യം വലിയ തോതിലുണ്ട്. ഇവയ്ക്കുള്ള ജൈവ രീതിയിലുള്ള പരിഹാരം നോക്കാം.

By Harithakeralam

2024-04-19

ഇടയ്ക്ക് മഴ ലഭിച്ചെങ്കിലും കേരളത്തിലിപ്പോഴും വരണ്ട കാലാവസ്ഥ തുടരുകയാണ്. പച്ചക്കറികള്‍ നല്ല പോലെ വളരുമെങ്കിലും രോഗങ്ങളും കീടങ്ങളും വലിയ തോതിലിപ്പോള്‍ പ്രശ്‌നങ്ങള്‍ സൃഷ്ടിക്കുന്നു. പാവല്‍, തക്കാളിപോലുള്ള വിളകളില്‍ വെളളീച്ചയുടെ ശല്യം വലിയ തോതിലുണ്ട്. ഇവയ്ക്കുള്ള ജൈവ രീതിയിലുള്ള പരിഹാരം നോക്കാം.

പാവലില്‍ കായീച്ച

പാവല്‍ നല്ല പോലെ കായ്ക്കാന്‍ തുടങ്ങിയിട്ടുണ്ടാകും. കൃത്യമായി നനയുണ്ടെങ്കില്‍ പാവല്‍ ഈ കാലാവസ്ഥയില്‍ മികച്ച വിളവ് നല്‍കും. എന്നാല്‍ കായീച്ചകള്‍ ശല്യക്കാരി എത്തിയിട്ടുണ്ടാകും. ഇതിനുള്ള പരിഹാരം നോക്കാം.

Related News

മാങ്ങ വീണ്ടു കീറി പൊഴിയുന്നു ; ജൈവ രീതിയില്‍ പരിഹരിക്കാം

കൊത്തമര നിറയെ കായ്കളുണ്ടാകാന്‍

കരളിനെ കാക്കാന്‍ ഈ ഭക്ഷണങ്ങള്‍ ഒഴിവാക്കുക

മണ്ണിലെ പുളിരസം നിയന്ത്രിച്ചു തക്കാളിക്കൃഷി

1. പാവല്‍ പേപ്പര്‍ കൊണ്ട് പൊതിഞ്ഞു നിര്‍ത്താന്‍ ശ്രദ്ധിക്കാം. ആക്രമണം നേരിട്ട കായ്കള്‍ യഥാസമയം പറിച്ച് നശിപ്പിക്കാം.  

2. കഞ്ഞിവെള്ള കെണി, മീന്‍ കെണി, പഴക്കെണി തുളസിക്കെണി എന്നിവയും പന്തലില്‍ അവിടവിടെയായി തൂക്കിയിടാം. ഫിറമോണ്‍ കെണി ആയ ക്യൂ ലൂര്‍ ഉപയോഗിച്ചും കായീച്ചകളെ കുടുക്കാം. രണ്ടുമാസം വരെ ഫിറമോണ്‍ കെണികള്‍ ഉപയോഗിക്കാം. പൂവിടുന്നതിന് ഒന്നു രണ്ടാഴ്ച മുമ്പ് തന്നെ കെണികള്‍  തോട്ടത്തില്‍ തൂക്കിയിടണം. പന്തലിന്റെ നാലുവശത്തും പല രീതിയിലുള്ള കെണികള്‍ തൂക്കിയിടാന്‍ ശ്രദ്ധിക്കാം.

3. ഒരുതവണ വെള്ളരി വര്‍ഗ പച്ചക്കറികള്‍ കൃഷി ചെയ്ത സ്ഥലത്ത് അടുത്ത തവണ മറ്റു വര്‍ഗത്തില്‍പ്പെട്ട പച്ചക്കറികള്‍ കൃഷി ചെയ്യുന്നതും  കായീച്ചകളുടെ ശല്യം കുറയ്ക്കാന്‍ സഹായിക്കും.

4. രണ്ടു ശതമാനം വീര്യമുള്ള വേപ്പെണ്ണ വെളുത്തുള്ളി മിശ്രിതം സ്‌പ്രേ ചെയ്യുന്നത് മുഞ്ഞ, വെള്ളീച്ച,  മണ്ഡരി എന്നിവയുടെ ആക്രമണത്തെ തടയും. ഇലകളും പൂക്കളും തിന്നു നശിപ്പിക്കുന്ന കീടങ്ങളെ തുരത്താനായി ഗോമൂത്രം കാന്താരി മുളക് മിശ്രിതം ഉപയോഗിക്കാം. ഒരു ലിറ്റര്‍ ഗോമൂത്രവും 10 ഗ്രാം കാന്താരിമുളക് അരച്ചതും ഒമ്പത് ലിറ്റര്‍ വെള്ളവും ചേര്‍ത്ത് നിര്‍മ്മിച്ച ലായനി അരിച്ചെടുത്ത് സ്‌പ്രേ ചെയ്യാവുന്നതാണ്.  

5. പലതരം മിത്രകീടങ്ങള്‍ തോട്ടത്തില്‍ ഉണ്ടായിരിക്കുന്നത് നല്ലതാണ്. മിത്ര കീടങ്ങളുടെ ഇളം ദശകള്‍ ഭക്ഷിക്കുന്നത് ശത്രുകീടങ്ങളെയാണ്. തലവെട്ടി, തുമ്പ, പെരുവലം, തുളസി,  മൈലാഞ്ചി,  ബന്ധി,  ചെമ്പരത്തി എന്നീ പൂച്ചെടികള്‍ തോട്ടത്തില്‍ ഉണ്ടായിരിക്കുന്നത് മിത്ര കീടങ്ങളെ തോട്ടത്തില്‍ നിലനിര്‍ത്തുന്നതിന് സഹായിക്കുന്നു.

6. 20ഗ്രാം സ്യൂഡോമൊണാസ് ഒരു ലിറ്റര്‍ വെള്ളത്തില്‍ കലക്കി അതില്‍ വിത്ത് മുക്കിവച്ചശേഷം നടുന്നത് അനേകം രോഗങ്ങളെ ചെറുക്കാന്‍ സഹായിക്കും. രോഗാരംഭത്തില്‍ തന്നെ ഇത് ചെയ്യാന്‍ ശ്രദ്ധിക്കണം. രോഗം വന്ന സസ്യഭാഗങ്ങള്‍ തീയിട്ടു നശിപ്പിച്ചശേഷ മാണ് പ്രതിരോധ മാര്‍ഗങ്ങള്‍ സ്വീകരിക്കേണ്ടത്.

തക്കാളിയില്‍ വെള്ളീച്ച

വരണ്ട അന്തരീക്ഷസ്ഥിതി തുടരുന്നതിനാല്‍ തക്കാളിയില്‍ വെളളീച്ചയുടെ ആക്രമണം കാണാന്‍ സാധ്യതയുണ്ട്. വെളളീച്ച ആക്രമണം തുടര്‍ന്നാല്‍ തക്കാളിച്ചെടി പെട്ടെന്നു നശിക്കും.

1. 2 ശതമാനം വീര്യമുളള വേപ്പെണ്ണ - വെളുത്തുളളളി മിശ്രിതം ഇലയുടെ അടിഭാഗത്ത് പതിയത്തക്ക വിധം 10 ദിവസം ഇടവേളകളിലായി ആവര്‍ത്തിച്ച് തളിക്കുക.  

2. ആക്രമണം രൂക്ഷമാണെങ്കില്‍ തൈയാമീതോക്സാം 4 ഗ്രാം പത്ത് ലിറ്റര്‍ വെളളത്തില്‍ കലക്കി തളിക്കുക.

3. വേപ്പെണ്ണയില്‍ കാന്താരി, വെളുത്തുള്ളി പോലുള്ള മാറി മാറി ഉപയോഗിക്കുക.