കൈ നിറയെ കാന്താരി വേണോ, ഇപ്പോള്‍ കൃഷി തുടങ്ങാം

കാന്താരി പല നിറങ്ങളിലും പല ആകൃതിയിലുമുണ്ട്. വെള്ളക്കാന്താരി, പച്ചക്കാന്താരി, നീലക്കാന്താരി, വൈലറ്റ്, നീളന്‍, ഉണ്ടക്കാന്താരി എന്നിങ്ങനെ പലയിനമുണ്ട്.

By Harithakeralam

2022-02-09

മലയാളിയോട് കാന്താരി മുളകിന്റെ ഗുണങ്ങള്‍ വിശദീകരിക്കണ്ട കാര്യമില്ല. കേരളത്തിലെവിടെയും നല്ല പോലെ വളര്‍ന്ന് വിളവ് തരുന്നയിനമാണിത്. ചീനിമുളക്, ചുനിയന്‍ മുളക്, പാല്‍ മുളക്, കിളി മുളക് തുടങ്ങിയ പേരുകളുമുണ്ട്.

കുഞ്ഞന്‍ ഭീകരന്‍

നല്ല ഡിമാന്റാണിപ്പോള്‍ കാന്താരി മുളകിന്. ചില സീസണില്‍ ആയിരത്തിനു മുകളില്‍ വില വന്നിരുന്നു. പാചകത്തിനും ഔഷധമായും കാന്താരി ഉപയോഗിക്കുന്നു. വിദേശത്ത് വരെ പ്രിയമേറെയാണ് ഈ മുളകിന്. വാതരോഗം , അജീര്‍ണം, വായുക്ഷോഭം, പൊണ്ണത്തടി, കൊളസ്ട്രോള്‍ എന്നിവ കുറയ്ക്കാന്‍ കാന്താരി ഉത്തമമാണന്ന് പറയപ്പെടുന്നു. ജീവകം സിയുടെ ഉറവിടമാണ് കാന്താരി മുളക്. ഇതില്‍ ധാരാളമുള്ള ക്യാപ്സിയില്‍ എന്ന രാസ ഘടകത്തിന് ശരീരത്തിലെ കൊളസ്ട്രോളിന്റെ അളവു കുറയ്ക്കാനും ഹൃദയാരോഗ്യത്തെ സംരക്ഷിക്കാനും കഴിയുമെന്നു തെളിഞ്ഞതോടെയാണ് കാന്താരിയുടെ ഡിമാന്റ് കൂടിയത്.

പല നിറത്തിലും ആകൃതിയിലും

കാന്താരി പല നിറങ്ങളിലും പല ആകൃതിയിലുമുണ്ട്. വെള്ളക്കാന്താരി, പച്ചക്കാന്താരി, നീലക്കാന്താരി, വൈലറ്റ്, നീളന്‍, ഉണ്ടക്കാന്താരി എന്നിങ്ങനെ പലയിനമുണ്ട്. പച്ച നിറമുള്ള ചെറിയ കാന്താരിക്കാണ് എരിവ് കൂടുതല്‍. വെള്ളക്കാന്താരിക്ക് എരിവ് താരതമ്യേന അല്‍പ്പം കുറവാണ്. കറികളില്‍ ഉപയോഗിക്കുന്നതിന് പുറമെ അച്ചാറിട്ടും ഉണക്കിയും കാന്താരി മുളക് സൂക്ഷിക്കാറാണ്ട്.

ഏതു കാലാവസ്ഥയിലും മുളക്

ഏതു കാലാവസ്ഥയിലും കാന്താരി നന്നായി വളരും. വെയിലോ മഴയോ ഒന്നും പ്രശ്നമല്ല. ഇനി പ്രത്യേകിച്ച് പരിചരണമൊന്നും നല്‍കിയില്ലെങ്കിലും വീട്ടാവശ്യത്തിന് വേണ്ട മുളക് ലഭിക്കും. വേനലില്‍ നനച്ചു കൊടുക്കുന്നത് നല്ലതാണ്. ചെടികള്‍ക്ക് മൂന്നുവര്‍ഷം വരെ ആയുസുണ്ട്. നേരിട്ടു സുര്യപ്രകാശം പതിക്കാത്ത സ്ഥലങ്ങളിലും വളരുമെന്നതിനാല്‍ കാന്താരി തെങ്ങിന്‍ തോപ്പുകളിലും മറ്റും ഇടവിളയായും കൃഷി ചെയ്യാം.

Related News

കോഴികള്‍ മുടങ്ങാതെ മുട്ടയിടും; ആഹാരത്തോടൊപ്പം ഇതുകൂടി കൊടുക്കൂ

ചുരുങ്ങിയ സമയം , മികച്ച വിളവ് - നടാം ടിഷ്യൂകള്‍ച്ചര്‍ തൈകള്‍

റോസാച്ചെടി നിറയെ പൂക്കള്‍ ; പ്രയോഗിക്കാം ഈ വളങ്ങള്‍

കോവല്‍ നിറയെ കായ്ക്കാന്‍ അത്ഭുത വളം

നടീലും പരിചരണവും

പണ്ട് കാന്താരി മിക്ക പറമ്പുകളിലും തനിയെ വളരുമായിരുന്നു. പ്രകൃതി തന്നെ അതിന്റെ വിതരണം നടത്തിയിരുന്നു. വിത്ത് മുളപ്പിക്കാന്‍ മൂത്ത് പഴുത്ത് പാകമായ മുളക് പറിച്ചെടുക്കണം. വിത്ത് കഴുകി മാംസളഭാഗങ്ങള്‍ ഒഴിവാക്കിയെടുക്കുക. വിത്ത് പച്ച വെള്ളത്തില്‍ കഴുകി വൃത്തിയാക്കി അല്‍പ്പം ചാരം ചേര്‍ത്തിളക്കണം. തുടര്‍ന്നു തണലില്‍ മൂന്ന് നാലു ദിവസം ഉണക്കുക. ഇതിനുശേഷം നഴ്സറിത്തടങ്ങളില്‍ വിത്ത് പാകാം. പാകിക്കഴിഞ്ഞ് തടങ്ങളില്‍ നിന്നും വിത്ത് ചിതറിപ്പോകാത്തവിധം നനയ്ക്കണം. വിത്തു മുളക്കാന്‍ തുടര്‍ച്ചയായി നനക്കേണ്ടി വരും. അഞ്ച് ആറ് ദിവസത്തിനുള്ളില്‍ മുളച്ചു തുടങ്ങും.തൈകള്‍ നാലില പരുവത്തില്‍ വളര്‍ച്ചയെത്തുമ്പോള്‍ പറിച്ചു നടാം. തൈകള്‍ പറിച്ചു നടുമ്പോള്‍ വേരുകള്‍ സ്യൂഡോമോണോസ് ലായനിയില്‍ മുക്കി നടുന്നതും നല്ലതാണ്. ഇങ്ങനെ ചെയ്യുന്നതിലൂടെ ബാക്റ്റീരിയല്‍ വാട്ടരോഗത്തെ ചെറുക്കാം. പറിച്ചു നടുമ്പോള്‍ അടിവളമായി ചാണകപ്പൊടിയോ മറ്റ് കമ്പോസ്റ്റ് വളങ്ങളോ നല്‍കാം. കാന്താരിയില്‍ കാര്യമായ കീടബാധ ഉണ്ടാകാറില്ല. നട്ട് 80ാം ദിവസം പൂത്തു തുടങ്ങും.

ഇലപ്പേനും വെള്ളീച്ചയും

കാന്താരിമുളകിന്റെ പ്രധാന ശത്രുക്കള്‍ വെള്ളിച്ചയും ഇലപ്പേനുമാണ്. ഇവയെ അകറ്റാനുള്ള മാര്‍ഗങ്ങള്‍

1. കിരിയാത്ത സത്ത് 10% വീര്യത്തില്‍, വേപ്പെണ്ണവെളുത്തുള്ളികാന്താരി സത്ത് 5% വീര്യത്തില്‍ , നാറ്റപ്പൂച്ചെടി സത്ത് 10% വീര്യത്തില്‍ ഇവയിലേതെങ്കിലും ഉപയോഗിക്കുക.

2. ബിവേറിയ വാസിയാന 20 ഗ്രാം /1 ലിറ്റര്‍ വെള്ളമെന്ന തോതില്‍ ആഴ്ച വിട്ട് സ്പ്രേ ചെയ്യുക.

3. തടത്തില്‍ വേപ്പിന്‍ പിണ്ണാക്ക്/ ആവണക്കിന്‍ പിണ്ണാക്ക് ചേര്‍ത്ത് തൈകള്‍ നടുക. പിന്നീട് വളപ്രയോഗത്തോടൊപ്പം നല്‍കുകയും ചെയ്യുക.

4. പുളിച്ച കഞ്ഞിവെള്ളം നേര്‍പ്പിച്ചത്/പുളിച്ച മോര് നേര്‍പ്പിച്ചത് ഇവ ഇലകളുടെ അടിവശത്ത് സ്പ്രേ

ചെയ്യുക.

കീടനാശിനിയായും

കീടങ്ങളെ അകറ്റുമെന്നതിനാല്‍ കാന്താരി ലായനിക്ക് ജൈവകൃഷിയില്‍ വളരെ പ്രാധാന്യമുണ്ട്. കാന്താരി മുളക് അരച്ച് സോപ്പ് ലായനിയില്‍ കലക്കികീടനാശിനിയായി ഉപയോഗിക്കാം. കാന്താരിയും ഗോമൂത്രവും ചേര്‍ന്നാല്‍ കീടങ്ങള്‍ പമ്പ കടക്കും.