കാര്‍ഷിക മേഖലയുടെ ഉന്നമനത്തിനായി 13,966 കോടി

കര്‍ഷകരുടെ ജീവിതം മെച്ചപ്പെടുത്തുന്നതിനായി ഏഴ് സുപ്രധാന തീരുമാനങ്ങളും യോഗത്തില്‍ തീര്‍പ്പാക്കി. ഇതില്‍, ഏറ്റവും പ്രധാനം ഡിജിറ്റല്‍ കാര്‍ഷിക മിഷനാണ്.

By Harithakeralam

2024-09-02

ന്യൂഡല്‍ഹി: കാര്‍ഷിക മേഖലയുടെ ഉന്നമനത്തിനായി 13,966 കോടിയുടെ പദ്ധതിക്ക് കേന്ദ്രമന്ത്രിസഭയുടെ അംഗീകാരം. പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന യോഗത്തിലാണ് കാര്‍ഷിക പ്രവര്‍ത്തനങ്ങള്‍ക്ക് പിന്തുണ നല്‍കുകയെന്ന ലക്ഷ്യത്തോടെ പദ്ധതികള്‍ക്ക് അംഗീകാരം നല്‍കിയിരിക്കുന്നത്. കര്‍ഷകരുടെ ഉന്നമനത്തിനുവേണ്ടി മന്ത്രിസഭായോഗത്തില്‍ മറ്റു ചില നിര്‍ണായക തീരുമാനങ്ങളെടുത്തതായും കേന്ദ്രമന്ത്രി അശ്വിനി വൈഷ്ണവ് അറിയിച്ചു. കൂടാതെ 2817 കോടിയുടെ ഡിജിറ്റല്‍ കാര്‍ഷിക മിഷനും  കേന്ദ്രമന്ത്രിസഭ അംഗീകാരം നല്‍കി.

കര്‍ഷകരുടെ ജീവിതം മെച്ചപ്പെടുത്താന്‍ ഏഴ് സുപ്രധാന തീരുമാനങ്ങളും യോഗത്തില്‍ തീര്‍പ്പാക്കി. ഇതില്‍, ഏറ്റവും പ്രധാനം ഡിജിറ്റല്‍ കാര്‍ഷിക മിഷനാണ്. പൈലറ്റ് പ്രോജക്ടുകള്‍ ഏറ്റെടുക്കുകയും അതില്‍ വിജയം നേടുകയും ചെയ്തിട്ടുണ്ട്. അതിന്റെ അടിസ്ഥാനത്തില്‍, മൊത്തം 2817 കോടി രൂപ മുതല്‍ മുടക്കില്‍ ഡിജിറ്റല്‍ കാര്‍ഷിക മിഷന്‍ സ്ഥാപിക്കുമെന്ന് അധികൃതര്‍ അറിയിച്ചു. ഇന്ത്യന്‍ ജനതയുടെ ഭക്ഷ്യ, പോഷകാഹാര സുരക്ഷ ഉറപ്പുവരുത്തുന്നതിന് 3,979 കോടി രൂപയുടെ പദ്ധതിക്കും അംഗീകാരമായിട്ടുണ്ട്. പോഷകാഹാരക്കുറവും പട്ടിണിയും പരിഹരിക്കുന്നത് ലക്ഷ്യംവച്ചുള്ള പദ്ധതികളാണ് രൂപകല്‍പ്പന ചെയ്തിരിക്കുന്നത്. കാലാവസ്ഥയെ പ്രതിരോധിക്കുന്നതിനുള്ള ക്രോപ് സയന്‍സ്, ഭക്ഷ്യസുരക്ഷ, പോഷകസുരക്ഷ എന്നിവ കണക്കിലെടുത്ത് കര്‍ഷകരെ 2047-ഓടെ സജ്ജമാക്കാനുള്ള പദ്ധതികള്‍ ഉടന്‍ ആരംഭിക്കുമെന്ന് മന്ത്രിസഭ അറിയിച്ചു.

Related News

പച്ചമുളകില്‍ നിന്ന് ഇരട്ടി വിളവ്: ശര്‍ക്കരയും മോരും പ്രയോഗിക്കാം

ഓണത്തെ വരവേല്‍ക്കാന്‍ ചെണ്ടുമല്ലിത്തോട്ടവുമായി ധനലക്ഷ്മി

കനത്ത മഴയും വെയിലും : കാര്‍ഷിക വിളകള്‍ക്ക് വേണം പ്രത്യേക സംരക്ഷണം

ഇലതീനിപ്പുഴു, ഉറുമ്പ് എന്നിവയെ അകറ്റാന്‍ നാടന്‍ പൊടിക്കൈകള്‍

കൂടാതെ, ഹോര്‍ട്ടികള്‍ച്ചറിന്റെ സുസ്ഥിര വികസനത്തിനായി 860 കോടി രൂപയുടെ പദ്ധതിക്കും മന്ത്രിസഭ അംഗീകാരം നല്‍കിയിട്ടുണ്ട്. ഇന്ത്യന്‍ കൗണ്‍സില്‍ ഓഫ് അഗ്രി റിസര്‍ച്ചിന് കീഴില്‍ 2020-ലെ വിദ്യാഭ്യാസനയത്തിന് അനുസൃതമായി കാര്‍ഷിക വിദ്യാഭ്യാസവും ഗവേഷണവും മാറ്റുന്നതില്‍ ശ്രദ്ധ കേന്ദ്രീകരിക്കും. കാര്‍ഷിക വിദ്യാഭ്യാസ ആവശ്യങ്ങള്‍ക്ക് വേണ്ടി 2,291 കോടി രൂപയാണ് മാറ്റിവെച്ചിരിക്കുന്നത്. 1,202 കോടി രൂപ കൃഷി വിജ്ഞാന കേന്ദ്രങ്ങള്‍ക്ക് വേണ്ടി അനുവദിച്ചിട്ടുണ്ടെന്നും മന്ത്രി വ്യക്തമാക്കി.