ഗ്രോബാഗിലെ തക്കാളിക്കൃഷി

ഗ്രോബാഗില്‍ കുറച്ച് തക്കാളിച്ചെടികള്‍ വളര്‍ത്തുകയാണെങ്കില്‍ വീട്ടാവശ്യത്തിനുള്ളവ നമുക്കു സ്വന്തമാക്കാം.

By Harithakeralam

2023-07-30

തക്കാളിയുടെ വില വര്‍ധന രാജ്യമെങ്ങും വലിയ ചര്‍ച്ചയായി മാറി കൊണ്ടിരിക്കുകയാണ്. തക്കാളി വിറ്റു കോടീശ്വരന്‍മാരായ പല കര്‍ഷകരുടെയും വാര്‍ത്ത നാം കണ്ടു കഴിഞ്ഞു. എന്നാല്‍ തക്കാളി കൃഷിയുടെ കാര്യത്തില്‍ നമ്മള്‍ കേരളീയര്‍ വളരെ പുറകിലാണ്. നമ്മുടെ കാലാവസ്ഥയും മണ്ണിലെ കൂടിയ അസിഡിറ്റിയുമാണ് പ്രധാന കാരണം. ഗ്രോബാഗില്‍ കുറച്ച് തക്കാളിച്ചെടികള്‍ വളര്‍ത്തുകയാണെങ്കില്‍ വീട്ടാവശ്യത്തിനുള്ളവ നമുക്കു സ്വന്തമാക്കാം. ഇതിനായി വാട്ടരോഗത്തെ ചെറുക്കാന്‍ കഴിവുള്ള നല്ലയിനം തക്കാളി വിത്തുകള്‍ വാങ്ങി മുളപ്പിച്ചെടുത്ത് നടുകയോ നഴ്‌സറികളില്‍ നിന്നു തൈകള്‍ വാങ്ങുകയോ ചെയ്യാം. വിത്തുകളും തൈകളും സ്യൂഡോമോണസ് ലായനിയില്‍ മുക്കുന്നത് കീടബാധയെ ചെറുക്കും.

മണ്ണ് തയ്യാറാക്കല്‍

നല്ല നീര്‍വാര്‍ച്ചയുള്ളതും ജൈവാശങ്ങള്‍ അടങ്ങിയതും അത്യാവശ്യം സൂര്യപ്രകാശം ലഭിക്കുന്നതുമായ മണ്ണാണ്  തക്കാളി കൃഷിക്ക് അനുയോജ്യം.  ഒരു പിടി കുമ്മായം ഒരു ഗ്രോ ബാഗിനെന്ന കണക്കില്‍ മണ്ണില്‍ നന്നായി മിക്‌സ് ചെയ്യണം. ശേഷം   അഞ്ച് അല്ലെങ്കില്‍ ആറ് ദിവസങ്ങള്‍ക്ക് ശേഷം വേണം തൈ നടാന്‍.  വാട്ട രോഗമുണ്ടാക്കുന്ന  ബാക്ടീരിയകള്‍ ഇതിനകം നശിക്കച്ചിരിക്കും. മാത്രമല്ല കുമ്മായം ചേര്‍ക്കുന്നതിലൂടെ ചെടിക്ക് ആവശ്യമായ കാല്‍സ്യം ലഭിക്കുകയും മണ്ണിലെ അമ്ലത്വം കുറയുകയും ചെയ്യും, മണ്ണിലെ അമ്ലത്വം കുറയുന്നത് നാം ചെടിക്ക് നല്‍കുന്ന വളം വേഗത്തില്‍ വലിച്ചെടുക്കാന്‍ സഹായകമാകും ,പുളി രസമുള്ള മണ്ണിലാണ് ബാക്ടീരിയകള്‍ മൂലമുള്ള വാട്ടവും വേരു ചീയലും വരുക.

Related News

മഞ്ഞപ്പൂക്കള്‍ കൊണ്ടൊരു 'വെള്ളച്ചാട്ടം': നിറംമാറും ഗോള്‍ഡന്‍ കാസ്‌കേഡ് സൗന്ദര്യം

കുളമ്പുരോഗം സ്ഥിരീകരിച്ചു ; ക്ഷീരകര്‍ഷകര്‍ ശ്രദ്ധിക്കേണ്ടത്

ഇല കാണാതെ വഴുതന കായ്ക്കാന്‍ സ്വീകരിക്കാം ഈ മാര്‍ഗങ്ങള്‍

ചെറുനാരങ്ങയുടെ തൊലി വെറുതെ കളയല്ലേ വളര്‍ച്ചാ ഉത്തേജകം തയാറാക്കാം

നടീല്‍ രീതി

ഒരു വലിയ ഗ്രോ ബാഗിലേക്ക് 1:1 എന്ന തോതില്‍ മണ്ണ് - പഴകിയ ചകിരിച്ചോറ്, രണ്ട് കപ്പ് ഉണങ്ങി പൊടിഞ്ഞ ചാണകപ്പൊടി എന്നിവ  ചേര്‍ക്കണം. കൂടാതെ  50 ഗ്രാം വേപ്പിന്‍ പിണ്ണാക്ക് പൊടിച്ചത് , 50 ഗ്രാം എല്ലുപൊടി  എന്നിവ മിക്‌സ് ചെയ്ത് നിറക്കാം. തൈ നടുന്ന സമയത്ത് ഗ്രോബാഗിന്റെ അറുപത് ശതമാനം നടീല്‍ മിശ്രിതം നിറച്ചാല്‍ മതി. തുടര്‍ന്ന് ഗ്രോബാഗിന്റെ ഒത്ത നടുവില്‍ ചെറിയ കുഴിയെടുത്ത് തൈ നടാം. തൈയുടെ വേരുകള്‍ക്ക് ക്ഷതം പറ്റാതെ ശ്രദ്ധിച്ചു വേണം മാറ്റി നടാന്‍.

പരിചരണം

1. കായ് പിടിച്ച ശേഷം തക്കാളിയുടെ അടിവശത്ത് കറുത്ത പുള്ളിപോലെ വന്നു കായ കേടായി പോകുന്നതിന് കാരണം കാല്‍സ്യത്തിന്റെ അഭാവമാണ് ( ഈ രോഗത്തെ Bloossm end rot എന്ന് പറയും ) ഇത് കുമ്മായം ചേര്‍ക്കുന്നതിലൂടെ പരിഹരിക്കപ്പെടും.  

2. തക്കാളിയില്‍ വിള്ളല്‍ ഉണ്ടാകുന്നത് ബോറോണ്‍ എന്ന സൂക്ഷ്മ മൂലകത്തിന്റെ കുറവാണ് ഇതിനു പരിഹാരം കാണാന്‍ 5 ഗ്രാം ബോറോക്‌സ് പൊടി മണ്ണില്‍ ചേര്‍ത്തു കൊടുക്കുക.

3. കുമ്മായത്തിന് പകരം  മുട്ടത്തോട് മിക്‌സിയിലിട്ട് പൊടിച്ചു മണ്ണില്‍ ചേര്‍ക്കുക. കാല്‍സ്യത്തിന്റെ അഭാവത്തിനു പരിഹാരമാകും, ഇത് ഇടയ്ക്കിടക്ക് തുടരുക.  

4. രണ്ടാഴ്ച കൂടുമ്പോള്‍ സ്യൂഡോമോണസ് ലായനി  ചെടിയുടെ ഇലകളിലും തടത്തിലും തളിക്കുന്നത് നല്ലതാണ്.

5. തക്കാളി ചെടിയുടെ ഇലകള്‍ മണ്ണില്‍ തട്ടാന്‍ ഇടവരരുത്. തക്കാളി ചെടിക്ക് കരുത്ത് കുറവായതിനാല്‍ കമ്പ് മണ്ണില്‍ തറച്ചു ചെടിക്ക് താങ്ങു കൊടുക്കുകയോ കെട്ടി വെക്കുകയോ ചെയ്യണം.  

6. തക്കാളിക്ക് പൊട്ടാഷ് മൂലകങ്ങള്‍ ലഭിക്കാന്‍ ചാരം തടത്തില്‍ അല്‍പ്പം കൊടുക്കുന്നത് ഗുണം ചെയ്യും. ഇത് പ്രായമായ  ചെടി പെട്ടെന്ന് പൂവിടാന്‍ സഹായിക്കും. എല്ലാതരം ജൈവ വളങ്ങളും തക്കാളി ചെടിക്ക് നല്‍കാം.  

7. ഉണങ്ങി പൊടിഞ്ഞ ചാണക പൊടി, അട്ടിന്‍ കാഷ്ടം പൊടിച്ചത്, മണ്ണിര കമ്പോസ്റ്റ് തുടങ്ങിയ വളങ്ങള്‍ ഏതെങ്കിലുമൊന്ന്  പതിനഞ്ച്- ഇരുപത് ദിവസം കൂടുമ്പോള്‍   നല്‍കണം. വളപ്രയോഗത്തിന് ശേഷം അല്‍പ്പം നടീല്‍ മിശ്രിതം മുകളില്‍ വിതറുകയും ചെയ്യണം.

വളര്‍ച്ചാ ഉത്തേജകം

പച്ചച്ചാണകവും കടലപ്പിണ്ണാക്ക്, വേപ്പിന്‍പ്പിണ്ണാക്ക് എന്നിവ പുളിപ്പിച്ചതിന്റെ തെളി തക്കാളിയുടെ വളര്‍ച്ചക്ക് ഏറെ ഗുണം ചെയ്യും. മേല്‍പറഞ്ഞവ എല്ലാം ചേര്‍ത്ത് 48 മണ്ണിക്കൂര്‍ പുളിപ്പിക്കാന്‍ വെക്കണം. ശേഷം ഇതില്‍ പതിനഞ്ച് മടങ്ങ് വെള്ളം ചേര്‍ത്ത് നന്നായി ഇളക്കി അതിന്റെ തെളിയെടുത്ത് വിളയുടെ ചുവട്ടില്‍ നിന്ന് അല്‍പ്പം മാറ്റി ഒഴിച്ചു കൊടുക്കുകയാണ് ചെയ്യേണ്ടത്. ചെടിയുടെ പെട്ടന്നുള്ള വളര്‍ച്ചക്കും പൂ ഇടാനും കായ പിടുത്തത്തിനും ഇതു സഹായിക്കും.