മുല്ലപ്പെരിയാറിന് കീഴിലെ പഴത്തോട്ടം

പാലയില്‍ നിന്നു കൊച്ചിയിലെത്തിയ കുടുംബമാണ് കുര്യന്‍ ജോസിന്റേത്. ബിസിനസുമായി കൊച്ചിയില്‍ ജീവിതമുറപ്പിച്ചപ്പോഴും കൃഷിയെ ഉപേക്ഷിച്ചില്ല. ബിസിനസ് ആവശ്യത്തിന് സ്ഥിരമായി മധുരയിലേക്ക് പോകുന്നത് കമ്പം-തേനി റൂട്ടിലായിരുന്നു. ഇത്തരം യാത്രക്കിടയിലാണ് ഫാം തുടങ്ങിയ സ്ഥലം കാണുന്നത്. തരിശു ഭൂമിയായിരുന്നു സ്ഥലം വാങ്ങുമ്പോള്‍. വേലികെട്ടി തിരിക്കുകയാണ് ആദ്യം ചെയ്തത്. ഇതിനു ശേഷം തോട്ടം ഓരോ മേഖലകളായി തിരിച്ചു പുണ്യാളന്‍മാരുടെ പേരും നല്‍കി. വലിയ ശ്രദ്ധ നല്‍കിയാണ് ഫാം രൂപകല്‍പ്പന ചെയ്തിരിക്കുന്നത്. കൃഷി സ്ഥലങ്ങളും പൂന്തോട്ടങ്ങളും ഫാം ഹൗസുകളുമെല്ലാം തികച്ചും ആധുനികമായ രീതിയില്‍ തന്നെയാണ് ഒരുക്കിയിരിക്കുന്നത്. തികച്ചും ജൈവരീതിയില്‍ മാത്രമാണ് കൃഷി. കൃഷി രീതികള്‍ കാണാനും പഠിക്കാനുമുള്ള സൗകര്യം ടൂറിസ്റ്റുകള്‍ക്കും ഒരുക്കിയിരിക്കുന്നു. ഫാമില്‍ സന്ദര്‍ശനം നടത്താനെത്തുന്നവര്‍ക്ക് കൃഷിപ്പണികളും ചെയ്യാം. പുതുതലമുറയിലെ മിക്ക കുട്ടികളും കൃഷി രീതികളൊന്നും അറിയാത്തവരും കാണാത്തവരുമാണ്. ഇവര്‍ക്ക് പ്രകൃതിയില്‍ അലിഞ്ഞ് കുറച്ചു ദിവസം ചെലവഴിക്കാനുള്ള സൗകര്യമാണ് ഹാര്‍വെസ്റ്റ് ഫ്രഷ് ഫാം ഒരുക്കുന്നതെന്നു പറയുന്നു കുര്യന്‍ ജോസും മകന്‍ കുര്യന്‍ ജോസ് ജൂനിയറും. 

മാതളനാരകം ഇത്രയധികം കൃഷി ചെയ്യുന്ന സൗത്ത് ഇന്ത്യയിലെ ഏക തോട്ടമാണ് ഹാര്‍വെസ്റ്റ് ഫാം. മുംബൈയില്‍ പോയാണ് കുര്യന്‍ ജോസ് കൃഷി രീതികള്‍ പഠിച്ചത്. എട്ട് ഏക്കറോളം സ്ഥലത്ത് എണ്ണായിരത്തോളം മാതളനാരകങ്ങള്‍ ഫാമിലുണ്ട്. തൊലിപൊളിച്ചാല്‍ അകത്ത് നല്ല ചുവപ്പുള്ള തരം മാതളനാരകമാണ് ഇവിടെ കൃഷി ചെയ്യുന്നത്. ബംഗളുരു, ചെന്നൈ തുടങ്ങിയ വന്‍ നഗരങ്ങളിലെ സൂപ്പര്‍മാര്‍ക്കറ്റുകളിലും ഓര്‍ഗാനിക്ക് ഷോപ്പുകളിലൂടെയുമാണ് മാതളം വിറ്റഴിക്കുന്നത്. ഹാര്‍വെസ്റ്റ് എന്ന ബ്രാന്‍ഡില്‍ ഒന്ന്, രണ്ടു കിലോ മാതളപ്പഴങ്ങള്‍ പാക്കറ്റിലാക്കി വില്‍ക്കുന്നു. 25 കിലോയുടെ വലിയ പാക്കറ്റിലും വില്‍ക്കുന്നുണ്ട്. ഫാമില്‍ നിന്നു പറിച്ചെടുത്ത് പേപ്പറില്‍ പൊതിഞ്ഞു ബ്രാന്‍ഡഡ് പാക്കറ്റിലാക്കിയാണ് വില്‍പ്പന. മാതളത്തിന്റെ ഔഷധഗുണങ്ങള്‍ മനസിലാക്കിയാണ് ഇതു കൃഷി ചെയ്യാന്‍ തുടങ്ങിയതെന്നു പറയുന്നു കുര്യന്‍ ജോസ് ജൂനിയര്‍. രണ്ടര ഏക്കറോളം സ്ഥലത്ത് റെഡ് ലേഡി പപ്പായയും വളര്‍ത്തുന്നു. ഇതും മാര്‍ക്കറ്റില്‍ വില്‍പ്പനയ്ക്ക് എത്തിക്കുന്നു. ആയിരത്തോളം തെങ്ങും മാവും, പ്ലാവ്, പേരക്ക, ചാമ്പ, മുള്ളാത്ത, നെല്ലി, സീതപ്പഴം, സപ്പോട്ട, ഫാഷന്‍ ഫ്രൂട്ട് എന്നിവയും ഫാമില്‍ കൃഷി ചെയ്യുന്നു. തികച്ചും ജൈവരീതിയിലാണ് ഫാമിലെ കൃഷികള്‍. ഓര്‍ഗാനിക് സര്‍ട്ടിഫിക്കേഷനുള്ള ചുരുക്കം ചില ഫാമുകളില്‍ ഒന്നാണിത്. ഇതിനെല്ലാം പുറമേ ആറായിരത്തോളം വനവൃക്ഷങ്ങളും ഫാമില്‍ വളര്‍ത്തുന്നുണ്ട്. 

കൃഷിയോടൊപ്പം ഫാം ടൂറിസവും നടപ്പാക്കിയാണ് ഹാര്‍വെസ്റ്റ് ഫാം ശ്രദ്ധേയമാകുന്നത്. വിദേശികളും സ്വദേശികളുമായി നിരവധി പേരാണ് ഫാമിലെത്തുക. കൃഷി രീതികള്‍ പഠിക്കാനായി കോളേജ് വിദ്യാര്‍ഥികളും എത്താറുണ്ട്. ഗ്രാമീണമായ രീതിയില്‍ കാളവണ്ടിയിലും കുതിരവണ്ടിയിലുമെല്ലാമാണ് സന്ദര്‍ശകരെ സ്വീകരിക്കുക. ഇവയില്‍ ചുറ്റിയടിച്ച് ഫാം കാണുകയും ചെയ്യാം. ട്രാക്റ്റര്‍ -ജീപ്പ് സവാരിക്കും ഫാമില്‍ സൗകര്യമുണ്ട്. ആധുനിക രീതിയില്‍ തയാറാക്കിയ ഫാം ഹൗസില്‍ താമസിക്കാം. ഫാമില്‍ തന്നെ തയാറാക്കിയ നാടന്‍ ഭക്ഷണവും ഹാര്‍വെസ്റ്റിലെ പ്രത്യേകതയാണ്. 

നാടന്‍ പശുക്കളും കോഴിയും താറാവും ഔഷധസസ്യങ്ങളുമെല്ലാം ഹാര്‍വെസ്റ്റ് ഫ്രഷ് ഫാമില്‍ വളരുന്നു. ജൈവവളങ്ങള്‍ തയാറാക്കാനും പാലിനുമാണ് നാടന്‍ പശുക്കളെ വളര്‍ത്തുന്നത്. നാടന്‍ കോഴികള്‍, താറാവ്, വാത്ത, ഗിനിക്കോഴി എന്നിവയെ നെറ്റിനുള്ളില്‍ തുറന്നാണ് വളര്‍ത്തുന്നത്. വിവിധ തരത്തിലുള്ള പച്ചക്കറികളും വളര്‍ത്തുന്നു. ഫാമിലെത്തുന്ന ടൂറിസ്റ്റുകള്‍ക്ക് ഭക്ഷണം തയാറാക്കാനാണ് പച്ചക്കറി കൃഷി. വിവിധ ചെടികളുടെ തൈകള്‍ തയാറാക്കുന്ന നഴ്‌സറിയാണ് ഫാമിന്റെ മറ്റൊരു പ്രത്യേകത. ഫാമിലേക്ക് ആവശ്യമായ തൈകള്‍ക്കു പുറമേ ആവശ്യമുള്ളവര്‍ക്ക് ഇവിടെയെത്തി തൈകള്‍ വാങ്ങുകയും ചെയ്യാം. ഔഷധ സസ്യങ്ങളുടെ ഉദ്യാനം പുതിയൊരു ഊര്‍ജമായിരിക്കും സന്ദര്‍ശകര്‍ക്കു പകരുക. 200 ഓളം ഔഷധ സസ്യങ്ങള്‍ ഉദ്യാനത്തില്‍ വളരുന്നു. പശ്ചിമഘട്ടത്തിനു കീഴില്‍ പരന്നു കിടക്കുന്ന പഴത്തോട്ടം മനസിനും ശരീരത്തിനും നല്‍കുക പുതിയൊരു ഉണര്‍വാണ്. തിരക്കുപിടിച്ച ജീവിതത്തില്‍ നിന്ന് അല്‍പ്പ സമയം മാറി നില്‍ക്കാന്‍ ആഗ്രഹിക്കുന്ന ആര്‍ക്കും ഇവിടെയെത്താം. പഴങ്ങളുടെ പറുദീസയില്‍ ശുദ്ധവായു ശ്വസിച്ച് പ്രകൃതിയില്‍ അലിഞ്ഞ് ജീവിക്കാം….