ഒരേക്കറില്‍ പൂപ്പാടമൊരുക്കി യുവകര്‍ഷകന്‍

പാട്ടത്തിനെടുത്ത ഒരേക്കര്‍ 20 സെന്റ് സ്ഥലത്ത് ചെണ്ടുമല്ലി തോട്ടമൊരുക്കിയെടുത്തിരിക്കുകയാണീ യുവ കര്‍ഷകന്‍.

By ഷാജി പൊന്നമ്പുള്ളി

ഓണസദ്യയൊരുക്കാന്‍ അരിയും പച്ചക്കറികളുമെല്ലാം കേരളത്തിലേക്ക് എത്തുന്നത് ഇതര സംസ്ഥാനങ്ങളില്‍ നിന്നുമാണ്. കുറച്ചു കാലമായി പൂക്കളമിടാനുള്ള പൂവും തമിഴ്‌നാട്ടില്‍ നിന്നും കര്‍ണടാകയില്‍ നിന്നുമാണ് നമ്മുടെ നാട്ടിലേക്കെത്തുന്നത്. ഗുണ്ടല്‍പേട്ട് പോലുള്ള സ്ഥലങ്ങളില്‍ കേരളത്തിന്റെ ഓണപ്പൂക്കളം കണ്ട് ഏക്കര്‍ കണക്കിന് സ്ഥലത്താണ് പൂക്കള്‍ കൃഷി ചെയ്യുന്നത്. എന്നാല്‍ നമ്മുടെ മണ്ണിലും പൂക്കൃഷി നല്ലപോലെ നടക്കുമെന്ന് തെളിയിച്ച നിരവധി പേരുണ്ട്, അവരിലൊരാളാണ് തൃശൂര്‍ ജില്ലയിലെ ചേര്‍പ്പ് ഊരകം സ്വദേശി കബീര്‍. പാട്ടത്തിനെടുത്ത ഒരേക്കര്‍ 20 സെന്റ് സ്ഥലത്ത് ചെണ്ടുമല്ലി തോട്ടമൊരുക്കിയെടുത്തിരിക്കുകയാണീ യുവ കര്‍ഷകന്‍.

മഞ്ഞയും ഓറഞ്ചും

ഓണത്തിന് പൂക്കളമിടാന്‍ ചെണ്ടുമല്ലിപ്പൂ നിര്‍ബന്ധമാണ്. സ്‌കൂളുകളിലും മറ്റു സ്ഥാപനങ്ങളിലുമെല്ലാം ഓണാഘോഷം നടക്കുമ്പോള്‍ പൂക്കളത്തില്‍ സ്റ്റാര്‍ ചെണ്ടുമല്ലി തന്നെ. ഇതളുകള്‍ പതിയെ അടര്‍ത്തിയെടുത്ത് നമുക്ക് ഇഷ്ടമുള്ള രൂപത്തില്‍ പൂക്കളമൊരുക്കാന്‍ ചെണ്ടുമല്ലി സൗകര്യപ്രദമാണ് എന്നതാണിതിനു കാരണം. ഓണക്കാലത്ത് ഈ പൂവിന് വലിയ ഡിമാന്‍ഡാണ് വിപണിയില്‍. ഇതു മനസിലാക്കിയാണ് കബീര്‍ ചെണ്ടുമല്ലി പാടമൊരുക്കിയത്. മഞ്ഞയും ഓറഞ്ചും നിറത്തിലുള്ള ചെണ്ടുമല്ലിയാണിപ്പോള്‍ ഒരേക്കര്‍ സ്ഥലത്ത് പൂത്തുലഞ്ഞു നില്‍ക്കുന്നത്. 65 സെന്റില്‍ മഞ്ഞയും 55 സെന്റില്‍ ഓറഞ്ചും പൂക്കളാണ് വിരിഞ്ഞു നില്‍ക്കുന്നത്.

Related News

നിലക്കടല വിളയും, നമ്മുടെ അടുക്കളത്തോട്ടത്തിലും

വീട്ടുമുറ്റത്തൊരു നെല്ലി മരം നടാം

പടവലത്തിലും പാവലിലും കായീച്ച, പയറില്‍ മുഞ്ഞയും കരിവള്ളിയും

മികച്ച വിളവിന് അറിഞ്ഞു കൃഷി ചെയ്യാം; ജൈവീക ഘടകങ്ങള്‍ പ്രധാനം

പാട്ട ഭൂമിയില്‍ പൂന്തോട്ടം

ചേര്‍പ്പ് പെരുമ്പിള്ളിശേരി കാവില്‍പ്പാടത്താണ് കൃഷി. നെടുമ്പിള്ളി വിജയന്റെ പാടമാണ് കബീര്‍ പാട്ടത്തിനെടുത്തത് കൃഷി നടത്തുന്നത്.  ഫെബ്രുവരിയില്‍ ഇവിടെ പച്ചക്കറി കൃഷി ചെയ്തിരുന്നു. ഇതു കഴിഞ്ഞ് മഴ ശക്തമായ സമയത്താണ് പൂക്കൃഷി ആരംഭിക്കുന്നത്. കൃത്യമായി പറഞ്ഞാല്‍ ജൂണ്‍ ഒമ്പതിനാണ് ചെണ്ടുമല്ലിയുടെ ഹൈബ്രീഡ് ചെടികള്‍ നട്ടത്.  മഴയുടെ ഭീഷണി നന്നായി ഉണ്ടായിരുന്നു, എന്നാലും തൈ നട്ടു- കബീര്‍ പറയുന്നു.

മള്‍ച്ചിങ്ങും തുള്ളി നനയും

പാടമായതിനാല്‍ പുല്ല് പെട്ടെന്നു തന്നെ വളര്‍ന്നു വരും, ചെണ്ടുമല്ലികള്‍ക്കിത് ഭീഷണിയാണ്. ഇതിനാല്‍ മള്‍ച്ചിങ് കൃഷി രീതിയാണ് സ്വീകരിച്ചിരിക്കുന്നത്. തുള്ളിനന സംവിധാനത്തിലൂടെ വെള്ളവും വളവും നല്‍കുന്നു. സാധാരണ രീതിയില്‍ വാരമെടുത്ത് ചാണകപ്പൊടി അടിവളമാക്കി  മള്‍ച്ചിങ് ഷീറ്റും വാട്ടര്‍പൈപ്പുമൊരുക്കിയാണ് തൈ നട്ടത്.  30 എം.എമ്മിന്റെ പൈപ്പാണ് ഉപയോഗിക്കുന്നത്.

വളവും വെള്ളമായി  

ആകെ മൂന്നു തവണയാണ് തുള്ളിനയിലൂടെ വളം കൊടുത്തിട്ടുള്ളത്. വെള്ളത്തില്‍ ലയിക്കുന്ന വളം നല്‍കിയിട്ടുള്ളത്. 15 ദിവസം ഇടവേളയിലാണ് ആദ്യരണ്ടു വളം കൊടുത്തിട്ടുള്ളത്. മൂന്നാമത്തെ വളം 25 ദിവസം  നല്‍കി. കൃത്യമായ പരിചരണം നല്‍കിയതിനാല്‍ ചെടികള്‍ നല്ല വളര്‍ച്ച കൈവരിച്ചു പൂക്കളുണ്ടായി. കീടങ്ങളുടെ ആക്രമണം ചെണ്ടുമല്ലിക്ക് വളരെ കുറവാണ്.

വിപണനം നേരിട്ട്

പാടത്ത് നിന്നു നേരിട്ടാണ് വിപണനം നല്‍കിയിട്ടുള്ളത്. മൊത്തക്കച്ചവടക്കാര്‍ക്ക് നല്‍കിയാല്‍ വേണ്ടത്ര ലാഭം ലഭിക്കില്ലയെന്നതാണ് അനുഭവം. നേരിട്ടു നല്‍കുമ്പോള്‍ അതിന്റേതായ മൂല്യം ലഭിച്ചിട്ടുണ്ട്. പൂക്കൃഷിക്കു ശേഷം പച്ചക്കറി കൃഷി ചെയ്യാനാണുദ്ദേശിക്കുന്നത്. മഴയയ്ക്കനുസരിച്ച് സെപ്റ്റംബര്‍ 15നു ശേഷമാണ് പച്ചക്കറി കൃഷി ആരംഭിക്കുക. കബീറിനൊപ്പം പിതാവും  ഭാര്യയും മകനും സഹായത്തിനുണ്ട്.