ചൂടിനെ ചെറുക്കാന്‍ ചെടികള്‍ക്ക് ഉത്തേജക ലായനി

ഇലകളും പച്ചച്ചാണകവും കടലപ്പിണ്ണാക്കുമെല്ലാം ഉപയോഗിച്ച് തയാറാക്കുന്ന ലായനി. തടത്തില്‍ നനവ് നിലനിര്‍ത്താനുമിതു സഹായിക്കും.

By Harithakeralam

2024-01-29

അന്തരീക്ഷത്തിലെ ചൂട് താങ്ങാനാകാതെ പച്ചക്കറിച്ചെടികള്‍ വാടി വീഴുന്ന കാഴ്ചയിപ്പോള്‍ സ്ഥിരമാണ്. രാസവളങ്ങള്‍ നല്‍കിയാല്‍ ഈ കാലാവസ്ഥയില്‍ വിപരീത ഫലമുണ്ടാകുകയും ചെയ്യും. പച്ചച്ചാണകം പോലുള്ളവയും ചൂട് കൂടിയ സമയത്ത് നല്‍കുന്നത് ഉചിതമല്ല. ഇതിനൊരു പരിഹാരമാണിന്ന് നിര്‍ദേശിക്കുന്നത്. ഇലകളും പച്ചച്ചാണകവും കടലപ്പിണ്ണാക്കുമെല്ലാം ഉപയോഗിച്ച് തയാറാക്കുന്ന ലായനി. തടത്തില്‍ നനവ് നിലനിര്‍ത്താനുമിതു സഹായിക്കും.

ആവശ്യമുള്ള സാധനങ്ങള്‍

1. പച്ചച്ചാണകം- അഞ്ച് കിലോ

2. കടലപ്പിണ്ണാക്ക്- രണ്ടു കിലോ

3. വേപ്പിന്‍പ്പിണ്ണക്ക്- ഒരു കിലോ

4. എല്ല് പൊടി ഒരു കിലോ

5. അഞ്ച് കിലോ അസോള അല്ലെങ്കില്‍ ചീമക്കൊന്ന ഇല (ഇവ ലഭ്യമല്ലെങ്കില്‍ പെട്ടെന്ന് അലിയുന്ന മറ്റ് ഇലകള്‍ ഉപയോഗിക്കാം)

6. വലിയ ഒരു ബക്കറ്റ് അല്ലെങ്കില്‍ മീഡിയം വലിപ്പമുള്ള ബാരല്‍.

Related News

ഗ്രോബാഗിലെ പടവലത്തില്‍ നിന്നും മികച്ച വിളവ്

ചൂടുള്ള കാലാവസ്ഥയില്‍ പ്രയോഗിക്കാന്‍ ചില നാട്ടറിവുകള്‍

മലമ്പുഴയിലെ പൂക്കാലം

പൈനാപ്പിള്‍ വിളയിക്കാം ഗ്രോബാഗിലും മണ്ണിലും

തയ്യാറാക്കുന്നവിധം

ഒന്നു മുതല്‍ അഞ്ച് വരെയുള്ള സാധനങ്ങളെല്ലാം കൂടി ബക്കറ്റ്/ബാരലില്‍ ഇട്ട് അല്‍പ്പം വെള്ളവും ഒഴിച്ച് ചെറുതായി ഇളക്കി രണ്ട് ദിവസം അടച്ച് വെക്കുക. രണ്ടാം ദിവസം ബക്കറ്റിലെ സാധനങ്ങള്‍ പുളിച്ച് പൊന്തിയിട്ടുണ്ടാവും. ഒന്നുകൂടി നന്നായി ഇളക്കി കുറച്ചുകൂടി വെള്ളമൊഴിച്ച് രണ്ട് മൂന്ന് ദിവസം കൂടി അടച്ച് വെക്കുക. ഇത്രയും ദിവസങ്ങള്‍കൊണ്ട് പച്ചിലയും ചാണകവും പിണ്ണാക്കും എല്ലാം കൂടി അലിഞ്ഞ് നല്ല കുഴമ്പ് പരുവത്തിലായിട്ടുണ്ടാവും. നന്നായി ഇളക്കി കുറച്ചെടുത്ത് ഉപയോഗിക്കാം.

പ്രയോഗിക്കാം

ഈ വളര്‍ച്ചാ ഉത്തേജകം രണ്ട് രീതിയില്‍ ഉപയോഗിക്കാം. കൂടുതല്‍ വെള്ളം ചേര്‍ത്ത് തടത്തില്‍ ഒഴിച്ചു കൊടുക്കുന്നതാണ് ഒരു രീതി. അല്ലെങ്കില്‍ കുഴമ്പു രൂപത്തിലുള്ള മിശ്രിതം അരക്കപ്പ് വീതം പച്ചക്കറി തടത്തില്‍ ചുറ്റുമൊഴിച്ചതിനു ശേഷം മണ്ണ് വിതറുക. തുടര്‍ന്നു നനച്ചു കൊടുക്കണം. ഇങ്ങനെ പത്ത് ദിവസം കൂടുമ്പോള്‍ പച്ചക്കറി വിളകള്‍ക്ക് നല്‍കിയാല്‍ ചെടികളില്‍ പുതിയ വേരുകളും തുടര്‍ന്നു പുതിയ തളിരിലകളും വരും. ചെടി കൂടുതല്‍ കരുത്തുറ്റതാവും. പൂ പൊഴിച്ചില്‍ തടഞ്ഞ് കൂടുതല്‍ വിളവ് തരാന്‍ ഈ വളര്‍ച്ചാ ഉത്തേജകം സഹായിക്കും.