ഇറച്ചിയും മീനും തൊട്ടാല്‍ പൊള്ളും: പച്ചക്കറി വിലയും കുതിക്കുന്നു: നടുവൊടിഞ്ഞ് പൊതുജനം

പച്ചക്കറി, കോഴിയിറച്ചി, ബീഫ്, മീന്‍ തുടങ്ങിയ എല്ലാത്തരം അവശ്യസാധനങ്ങള്‍ക്കും കഴിഞ്ഞ ഒരുമാസത്തിനിടെ ഇരട്ടിയിലധികമാണ് വില വര്‍ധിച്ചത്.

By Harithakeralam

2025-06-08

ഇറച്ചിക്കും മീനിനുമൊപ്പം പച്ചക്കറി വിലയും കൂടുന്നതോടെ ദുരിതത്തിലായിരിക്കുകയാണ് പൊതുജനം. സാധാരണക്കാരന്റെ തീന്‍മേശയില്‍ വിഭവങ്ങളുടെ എണ്ണം കുറയുയാണ്.  പച്ചക്കറി, കോഴിയിറച്ചി, ബീഫ്, മീന്‍ തുടങ്ങിയ എല്ലാത്തരം അവശ്യസാധനങ്ങള്‍ക്കും കഴിഞ്ഞ ഒരുമാസത്തിനിടെ ഇരട്ടിയിലധികമാണ്  വില വര്‍ധിച്ചത്. വലിയ പെരുന്നാള്‍ ആഘോഷം കൂടിയെത്തിയതോടെ ഇറച്ചിയുടെ വില പിന്നെയും വര്‍ധിച്ചിരിക്കുകയാണ്.

മലയാളിയുടെ പ്രിയ ഭക്ഷണമായ കോഴി വില 200 മുകളിലായിട്ട് ആഴ്ചകളായി. 240 രൂപയാണ് കേരളത്തിലെ പല സ്ഥലങ്ങളിലും കിലോയ്ക്കിപ്പോള്‍ കോഴി വില. തമിഴ്നാട്ടില്‍ നിന്നുള്ള കോഴിവരവ് കുറഞ്ഞതും കാലാവസ്ഥാ വ്യതിയാനവുമാണ് വിലവര്‍ധനയ്ക്കുള്ള കാരണമെന്നാണ് വ്യാപാരികള്‍ പറയുന്നത്. വലിയ പെരുന്നാള്‍ കൂടി എത്തിയതോടെ ഇറച്ചിയുടെ ഡിമാന്റും കൂടി. ഇതോടെ ബീഫിനും വില  വര്‍ധിച്ചു. മാസങ്ങള്‍ക്കു മുന്‍പ് 280 മുതല്‍ 320 രൂപ വിലയുണ്ടായിരുന്ന ഒരു കിലോഗ്രാമിന് ബീഫിന് ഇപ്പോള്‍ 370 മുതല്‍ 400 രൂപ വരെയാണ് പലയിടത്തും വില.

Related News

അമിതമായാല്‍ ചായയും നല്ലതല്ല

തക്കാളിച്ചെടി നിറയെ കായ്കള്‍: മണ്ണിലെ അമ്ലത കുറച്ച് കൃഷി ചെയ്യാം

തക്കാളി ഇലകളില്‍ പൂപ്പല്‍, മുളക് ഇല ചുരുളുന്നു; ഇലകളെ ബാധിക്കുന്ന കീടങ്ങളെ തുരത്താം

മഴ ശക്തമായതോടെ കൊതുകു ശല്യം രൂക്ഷം: രോഗങ്ങള്‍ പടരാതെ സൂക്ഷിക്കണം

പച്ചക്കറി വില ഇതിനിടെ അല്‍പ്പം കുറഞ്ഞ് 20 മുതല്‍ 50 രൂപയുടെ വരെ ഇടയില്‍ നിന്നിരുന്നതാണ്.  എന്നാല്‍ പലതിന്റെയും വിലയിപ്പോള്‍ വര്‍ധിക്കുന്നു.  തേങ്ങയുടെ വില 76ല്‍ നിന്നു 83 രൂപയായി. രണ്ടാഴ്ച മുന്‍പ് വരെ കിലോഗ്രാമിന് 20 മുതല്‍ 25 രൂപ വരെ വിലയുണ്ടായിരുന്ന തക്കാളിയുടെ വിലയിപ്പോള്‍ 30 രൂപയാണ്. വെണ്ടയ്ക്ക, വഴുതനങ്ങ, കാരറ്റ്, ബീന്‍സ്, പച്ചമുളക് എന്നിവയ്ക്കും മുന്‍പുണ്ടായിരുന്നതിനെക്കാള്‍ വില വര്‍ധിച്ചിട്ടുണ്ട്.

മീന്‍ വിലയാണ് ആളെ ഞെട്ടിക്കുന്നത്. നമ്മുടെ പ്രിയ മത്സ്യങ്ങളായ അയലയ്ക്കും മത്തിക്കും 200 രൂപയ്ക്കു മുകളിലാണ് വില. ഒരു കിലോഗ്രാം മത്തിക്ക് ഇന്നലെ 200 രൂപയാണ് വില. അയലയ്ക്കു കിലോഗ്രാമിന് 260  രൂപ. ആവോലി, അയക്കൂറ തുടങ്ങിയവയുടെ വിലയിലും 50 മുതല്‍ 80 രൂപ വരെ വില വര്‍ധിച്ചു.