അഡീനിയം, ഓര്‍ക്കിഡ്, ബോഗണ്‍വില്ല ; പൂന്തോട്ട വിശേഷങ്ങളും പരിചരണ മാര്‍ഗങ്ങളും

ചെറുതോട്ടങ്ങള്‍ ഒരുക്കി വലിയ പൂന്തോട്ടത്തിന്റെ പരിപാലകയായി തീര്‍ന്ന വീട്ടമ്മയാണ് അനില ശിവരാമന്‍. അഡീനിയം, ഓര്‍ക്കിഡ്, ബോഗണ്‍വില്ല എന്നിവയുടെ പരിചരണമാര്‍ഗങ്ങളെക്കുറിച്ച് ഇവര്‍ വ്യക്തമാക്കുന്നു.

By ഷാജി പൊന്നമ്പുള്ളി

2023-07-09

ചെറുതോട്ടങ്ങള്‍ ഒരുക്കി വലിയ പൂന്തോട്ടത്തിന്റെ പരിപാലകയായി തീര്‍ന്ന വീട്ടമ്മയാണ് തൃശൂര്‍ മുരിയാട് ആനന്ദപുരം പുളിക്കപ്പറമ്പില്‍ അനില ശിവരാമന്‍. 30 വര്‍ഷമായി ഇവര്‍ തന്റെ വീട്ടുമുറ്റത്ത് ചെടികള്‍ വളര്‍ത്തുന്നു. അഡീനിയം, ബോഗണ്‍വില്ലകള്‍ ഒരുക്കുന്നതിനാണു പ്രാധാന്യം നല്‍കുന്നത്. ഓര്‍ക്കിഡും അതോടൊപ്പം മറ്റുചെടികളും പൂന്തോട്ടത്തില്‍ ഉണ്ട്. ആവശ്യക്കാര്‍ നേരിട്ടും ഓണ്‍ലൈനിലൂടെയും ഈ വീട്ടമ്മയ്ക്ക് അരികെയെത്തുന്നു. അഡീനിയം, ഓര്‍ക്കിഡ്, ബോഗണ്‍വില്ല എന്നിവയുടെ പരിപാലനത്തെക്കുറിച്ച് അനില ശിവരാമന്‍ വ്യക്തമാക്കുന്നു.

അഡീനിയം  

1. ഫെബ്രുവരി, ആഗസ്റ്റ്, സെപ്റ്റംബര്‍ മാസങ്ങളാണ് പ്രൂണിംഗിനു ( അത്യാവശ്യമല്ലാത്തതു മാറ്റിക്കളയല്‍) തെരഞ്ഞെടുക്കേണ്ടത്.  2. രാവിലെയാണ് പ്രൂണിംഗിന് പറ്റിയ സമയം. രണ്ട് സെന്റിമീറ്റര്‍ അല്ലെങ്കില്‍ മൂന്ന് സെന്റിമീറ്റര്‍ നീളത്തില്‍ പ്രൂണിംഗ് ചെയ്യാം.

3. പ്രൂണിംഗ് ചെയ്യുമ്പോള്‍ വരുന്ന ദ്രാവകം ( പാന്‍) തുടച്ചു കളഞ്ഞ് സെയ്ഫ് ഫംഗിസെയ്ഡ് തേയ്ക്കണം.  

4. പ്രൂണിംഗ് കഴിഞ്ഞാല്‍ വെയിലത്ത് വയ്ക്കണം.  

5. വളമിട്ടു കൊടുക്കണം. ( ചാണകപ്പൊടി, എല്ല്പൊടി, വേപ്പിന്‍പിണ്ണാക്ക്, രാസവളം-19.19.19)

6. രണ്ടുദിവസം കൂടുമ്പോള്‍ നന്നായി വെള്ളമൊഴിച്ചു കൊടുക്കണം.  

7. 30 ദിവസം കഴിയുമ്പോള്‍ പൂവിനു വളം കൊടുക്കണം

8. റീപ്പോട്ടിംഗ്-ഡിസംബര്‍, ജനുവരി മാസത്തില്‍ ചെയ്യാം.  

9. റീപ്പോട്ടിംഗ് ചെയ്തു കഴിഞ്ഞാല്‍ നിറയെ വെള്ളം ഒഴിച്ചുകൊടുക്കണം. അതു കഴിഞ്ഞാല്‍ ആഴ്ചയില്‍ മൂന്നുദിവസം വേര് നനയാന്‍ വെള്ളം ഒഴിച്ചാല്‍ മതി.  

10. റീപ്പോട്ടിംഗ് ചെയ്യുമ്പോള്‍ വളം അധികം ഇടണ്ട.  

11. നല്ല സൂര്യപ്രകാശം കിട്ടുന്ന സ്ഥലം വേണം അഡീനിയം ചെടിവയ്ക്കാന്‍. പൂവ് നന്നായിട്ടുണ്ടാകാന്‍ ഗ്രീന്‍കെയര്‍, മിറാക്കിള്‍ 20 - ഇതില്‍ ഏതെങ്കിലുമിട്ട് കൊടുക്കാം.  

Related News

വിളവെടുക്കാന്‍ എളുപ്പം; ചെടി മുരിങ്ങ നട്ടാല്‍ ഗുണങ്ങളേറെ

രോഗ-കീട ബാധയില്ലാതെ പച്ചക്കറികളില്‍ ഇരട്ടി വിളവ്; ചീമക്കൊന്നയും ചാണകവും

ആഫ്രിക്കന്‍ പന്നിപ്പനി: അറവുമാലിന്യം തത്കാലം പന്നികള്‍ക്ക് നല്‍കേണ്ട ; കര്‍ഷകര്‍ ശ്രദ്ധിക്കേണ്ടത്

കറിവേപ്പ് ചെടി ആരോഗ്യത്തോടെ വളരാന്‍ നീറ്റുകക്ക

ഓര്‍ക്കിഡ്  

1. ഓര്‍ക്കിഡ് പറിച്ചു മാറ്റിവയ്ക്കാന്‍ ഏറ്റവും നല്ല സമയം ജൂണ്‍, ജൂലൈ മാസങ്ങളാണ്.  

2. നാലുമാസം വരെ ചാണകവെള്ളം നേര്‍പ്പിച്ചത്, പിന്നീട് കപ്പലണ്ടി പിണ്ണാക്ക് പുളിപ്പിച്ചു നേര്‍പ്പിച്ചത് ആഴ്ചയില്‍ ഒരുദിവസം വച്ച് ഒഴിച്ചുകൊടുക്കുന്നതാണു നല്ലത്.  

3. അഞ്ചുമാസം മുതല്‍ പഴത്തൊലി, ഉള്ളിതോട് എന്നിവ വെള്ളത്തിലിട്ട് പുളിപ്പിച്ചതിനുശേഷം ഒരു ലിറ്ററിന് അഞ്ചുലിറ്റര്‍ വെള്ളം ചേര്‍ത്ത് ഒഴിച്ചുകൊടുക്കാം.  

4. എട്ടു മാസം മുതല്‍ പയര്‍, കടല എന്നിവ കുതിര്‍ത്ത് മിക്സിയില്‍ അടിച്ച് ഒരു ലിറ്ററിന് അഞ്ചുലിറ്റര്‍ വെള്ളം ചേര്‍ത്ത് അടിച്ചുകൊടുക്കുക.  

5. 11 മാസമാകുമ്പോള്‍ പൂവിനുള്ള വളം, ഗ്രീന്‍കെയര്‍, മിറാക്കിള്‍ 20 ഏതെങ്കിലും ആഴ്ചയില്‍ ഒരുദിവസം ഒഴിച്ചുകൊടുക്കാം.  

6. ജനുവരി മുതല്‍ രണ്ടുനേരം വെള്ളം ഒഴിച്ചുകൊടുക്കണം.  

7. മഴക്കാലത്ത് ഒന്നിടവിട്ട് നനച്ചാല്‍ മതി.

ബോഗണ്‍വില്ല  

1. വര്‍ഷത്തില്‍ മൂന്നു പ്രാവശ്യം പ്രൂണ്‍ ചെയ്യണം. ഫെബ്രുവരി, ജൂണ്‍, ഒക്ടോബര്‍ മാസങ്ങളാണ് അനുയോജ്യം.  

2. പ്രൂണ്‍ ചെയ്യുമ്പോള്‍ നല്ലതുപോലെ വളമിട്ടുകൊടുക്കണം. നല്ലരീതിയില്‍ വളരാന്‍ ജൈവവളമാണു നല്ലത്.  ചാണകപ്പൊടി, എല്ല്പൊടി, വേപ്പിന്‍ പിണ്ണാക്ക്, തേയിലചണ്ടി, മുട്ടത്തോട് എന്നിവ ഇട്ടുകൊടുക്കണം.  

രാസവളമാണെങ്കില്‍ എന്‍.പി.കെ, ഡി.എ.പി ഇതില്‍ ഏതെങ്കിലുമിട്ട് കൊടുക്കാം- പൂവ് പിടിക്കാനാണ്  ഇതു നല്‍കേണ്ടത്.  

3. വളമിട്ടുകൊടുത്തതിനുശേഷം പത്തുദിവസം നന്നായി നനയ്ക്കണം.  അതിനുശേഷം ഒന്നിടവിട്ട് നനച്ചാല്‍ മതി.

4. അതിനുശേഷം 15 ദിവസം കൂടുമ്പോള്‍ കടുക്, പിണ്ണാക്ക്, വേപ്പിന്‍പിണ്ണാക്ക്, എല്ല്പൊടി, തേയില, പിന്നെ പൊട്ടാഷ് അല്ലെങ്കില്‍ ഡി.എച്ച്.പി ഇട്ട് അഞ്ചുദിവസം പുല്‍പ്പിച്ചതിനുശേഷം വെള്ളമൊഴിച്ച് ഒരു ലിറ്റര്‍ ലായനിയിലേക്ക് അഞ്ചുലിറ്റര്‍ വെള്ളം ഒഴിച്ചു നേര്‍പ്പിച്ചതിനുശേഷം ചെടിയുടെ തടത്തിലൊഴിച്ചുകൊടുക്കാം.  

5. പ്രൂണ്‍ ചെയ്ത് 25 ദിവസം കഴിഞ്ഞ് ആഴ്ചയില്‍ രണ്ടുതവണ വച്ച് മൂന്നാഴ്ച ഒഴിച്ച് കൊടുക്കണം. അപ്പോള്‍ നല്ലതുപോലെ പൂവ് ഇടും.