ദിവസം 3600 ലിറ്റര്‍ പാല്‍; 2.72 കോടി വരുമാനം, രണ്ടാം തവണയും ക്ഷീരസഹകാരി പുരസ്‌കാരം നേടി ഇടുക്കിക്കാരന്‍

കഴിഞ്ഞ വര്‍ഷം ഏറ്റവും കൂടുതല്‍ പാലളന്ന കര്‍ഷകന് നല്‍കുന്ന ക്ഷീരസഹകാരി അവാര്‍ഡിന് ഇടുക്കി സ്വദേശി കെ.ബി.ഷൈന്‍ അര്‍ഹനായി.

By ഐബിന്‍ കാണ്ടാവനം

2026-01-16

ക്ഷീരവികസന വകുപ്പിന്റെ വിവിധ പുരസ്‌കാരങ്ങള്‍ ക്ഷീരവികസന വകുപ്പു മന്ത്രി ജെ.ചിഞ്ചുറാണി പ്രഖ്യാപിച്ചു. ക്ഷീരവികസന വകുപ്പിന്റെ നേതൃത്വത്തില്‍ സംസ്ഥാന ക്ഷീരസംഗമം 'പടവ് 2026'ന്റെ ഭാഗമായി ക്ഷീരകര്‍ഷകര്‍ക്ക് നല്‍കുന്ന പുരസ്‌കാരങ്ങളാണ് പ്രഖ്യാപിച്ചത്. കഴിഞ്ഞ വര്‍ഷം ഏറ്റവും കൂടുതല്‍ പാലളന്ന കര്‍ഷകന് നല്‍കുന്ന ക്ഷീരസഹകാരി അവാര്‍ഡിന് ഇടുക്കി സ്വദേശി കെ.ബി.ഷൈന്‍ അര്‍ഹനായി. ഇത് രണ്ടാം തവണയാണ് ക്ഷീരസഹകാരി അവാര്‍ഡ് ഷൈനിനെ തേടിയെത്തുന്നത്. ദിവസം 3600 ലിറ്റര്‍ പാല്‍! അതിനു മുകളില്‍ വയ്ക്കാന്‍ കേരളത്തില്‍ മറ്റൊരു ഫാമും കര്‍ഷകനുമില്ല. ക്ഷീരവികസന വകുപ്പിന്റെ ക്ഷീര സഹകാരി പുരസ്‌കാരം രണ്ടാം തവണയും ഇടുക്കി ഉടുമ്പന്നൂര്‍ കുര്‍മുളാനിയില്‍ കെ.ബി.ഷൈനിനെ തേടിയെത്താനുള്ള കാരണവും അതുതന്നെ.  ആകെ ഉരുക്കള്‍ 330. ഇതില്‍ 280 കറവപ്പശുക്കളും 30 കിടാരികളും 20 കന്നുകുട്ടികളും ഉള്‍പ്പെടും.

പ്രതിദിനം ഉല്‍പാദിപ്പിക്കുന്ന 3600 ലിറ്റര്‍ പാലില്‍ 1200 ലിറ്റര്‍ പ്രാദേശികമായി വില്‍ക്കുന്നുണ്ട്. ശേഷിക്കുന്ന 2400 പാല്‍ ക്ഷീരവികസന വകുപ്പിന്റെ, ഇളംദേശം ബ്ലോക്ക് ക്ഷീരവികസന ഓഫീസിന് കീഴിലുളള അമയപ്ര ക്ഷീരോല്‍പാദക സഹകരണ സംഘത്തില്‍ അളക്കുന്നു. 2024-25 സാമ്പത്തിക വര്‍ഷത്തില്‍ അമയപ്ര ക്ഷീരസംഘം, വെസ്റ്റ് കടയത്തൂര്‍ ക്ഷീരസംഘം, പെരിങ്ങാശ്ശേരി ക്ഷീരസംഘം എന്നിവിടങ്ങളിലായി 6,10,699 ലിറ്റര്‍ പാലാണ് ഷൈന്‍ അളന്നിരിക്കുന്നത്. ലിറ്ററിന് ശരാശരി 44.52 രൂപ പാല്‍വില ക്ഷീരസംഘത്തില്‍ നിന്നും ലഭിക്കുന്നുണ്ട്. ക്ഷീരസംഘത്തില്‍ അളന്ന പാലില്‍നിന്ന് 2.72 കോടി രൂപയാണ് ഷൈനിന്റെ വരുമാനം. പച്ചച്ചാണകം കൃത്യമായി സംസ്‌കരിക്കുന്നു. ഇതിനായി യുവി ഷീറ്റ് മേല്‍ക്കുരയുള്ള ഷെഡ് നിര്‍മിച്ചിട്ടുണ്ട്. യുവി ഷീറ്റിന്റെ ചൂടില്‍ ചാണകം വേഗം ഉണങ്ങും. മഴക്കാലത്തും നനയാതെ ചാണകം സൂക്ഷിക്കാം. മാസം 2000 കിലോ ഉണക്കച്ചാണകം വില്‍ക്കാന്‍ കഴിയുന്നുണ്ട്.

Related News

റോസച്ചെടികളുടെ ഇലകളില്‍ കുരുടിപ്പ്

ചെമ്പരത്തി ചായ കുടിക്കാം: ആരോഗ്യം സംരക്ഷിക്കാം

പ്രമേഹത്തിന്റെ പിടിയില്‍ നിന്നും രക്ഷ നേടാം

വെയിലാണെന്നു കരുതി നന അമിതമാകരുത്: ഈര്‍പ്പം വര്‍ധിച്ചാല്‍

ഇടുക്കി, എറണാകുളം ജില്ലകളില്‍ സമൃദ്ധമായി ലഭിക്കുന്ന പൈനാപ്പിള്‍ ലീഫാണ് പശുക്കളുടെ ഭക്ഷണം. ഉല്‍പാദനകാലം അവസാനിച്ച തോട്ടങ്ങളില്‍നിന്ന് പൈനാപ്പിള്‍ ചെടി ഫാമിലെത്തിക്കുന്നു. ചാഫ് കട്ടറില്‍ ചെറുതായി അരിഞ്ഞാണ് പശുക്കള്‍ക്കു നല്‍കുക. ഉയര്‍ന്ന ജലാംശമുള്ളതും നാരുകളും മറ്റു പോഷകങ്ങളും ചേര്‍ന്ന മികച്ച പരുഷാഹാരമാണ് പൈനാപ്പിള്‍ ഇല. ഇതിനൊപ്പം സാന്ദ്രിത തീറ്റയും നല്‍കുന്നുണ്ട്. പ്രസവിച്ച് മൂന്നു മാസത്തിനുള്ളില്‍ ചെന പിടിപ്പിക്കുന്നതാണ് ഇവിടുത്തെ രീതി. അതുകൊണ്ടുതന്നെ വര്‍ഷത്തില്‍ ഒരു പ്രസവം സാധ്യമാക്കാന്‍ കഴിയുന്നുമുണ്ട്. 10 മാസമാണ് സാധാരണ പശുക്കളുടെ കറവക്കാലം. അതുകൊണ്ടുതന്നെ പരമാവധി നേരത്തെ ചെന പിടിച്ചെങ്കില്‍ മാത്രമേ ഡെയറി ഫാം സംരംഭം ലാഭകരമായി മുന്‍പോട്ടു കൊണ്ടുപോകാന്‍ സാധിക്കൂ.

പശുക്കള്‍ക്ക് അകിടുവീക്കം വരാതിരിക്കാനാണ് പ്രത്യേക ശ്രദ്ധ നല്‍കേണ്ടത്. കേരളത്തില്‍ത്തന്നെ ഏറ്റവും കൂടുതല്‍ പശുക്കളെ വളര്‍ത്തുന്ന കര്‍ഷകനെന്ന നിലയ്ക്ക് അക്കാര്യത്തിന് പ്രത്യേകത ശ്രദ്ധ ഷൈന്‍ നല്‍കുന്നുണ്ട്. കറവ കഴിഞ്ഞ് ഉടനെ പശു കിടക്കുന്നത് അകിടുവീക്കത്തിനു കാരണമാകും. അതിനാല്‍ കറവയ്ക്കൊപ്പം തീറ്റയും നല്‍കുന്നുണ്ട്. പശുക്കള്‍ ഉടനെ കിടക്കുന്നത് ഒഴിക്കാന്‍ ഇത് സഹായിക്കുന്നു.